Rusiya Sibirdə yeni meqapolislər salacaq Rusiya Federasiyası Baş nazirinin müavini Viktoriya Abramçenko müdafiə naziri Sergey Şoyqunun Sibirdə yeni şəhərlər salmaq təşəbbüsünü dəstəklədiyini bildirib. Azvision.az RİA Novosti nəşrinə istinadən xəbər verir ki, RF müdafiə naziri Sergey Şoyqu avqust ayında Novosibirsk şəhərindəki Akademqorodokda elmi ictimaiyyətlə görüşündə Sibirdə 300 mindən 1 milyona qədər əhalisi olan üç böyük şəhərin salınmasını və onları xüsusi fəaliyyət sferasına (məsələn, energetika, ağac emalı və ya neft kimyası sənayesi və s.) yönəltməyi lazım bildiyini söyləyıb. Vahid Rusiya partiyasının nümayəndələri ilə görüşdə Rusiya Prezidenti Vladimir Putin də hərbi nazirin səsləndirdiyi təklifi dəstəkləyərək, Sibirin inkişafı ilə bağlı təkliflərin hazırlanması və rəsmiləşdirilməsinin zəruriliyindən danışıb. "Sergey Kujugetoviçin təşəbbüslərini dəstəkləyirəm, Omsk bölgəsinə səfərimiz ərəfəsində onunla görüşdük və bu təşəbbüsləri müzakirə etdik. Bu, Sibirin potensialı nəzərə alınaraq Sovet dövründə əsası qoyulan inkişafın faktiki olaraq yenidən bərpasıdır. Bu klaster yanaşmasıdır, ayrı-ayrı klasterlərin – Sibir subyektləri ərazisində sənayenin, elmin və texnologiyanın inkişafıdır. Gənclər Sibirdə qalmalıdır", - Omskda iki günlük səfərdə olan Abramçenko deyib. Baş nazirin müavini bildirib ki, gəncləri cəlb etmək üçün heç bir ekoloji problemin olmadığı, "müasir mənzillərin və insanların xoşbəxt yaşayıb-işləməkdən məmnun qalacağı şəraitin" olduğu rahat bir mühitə ehtiyac var. Onun sözlərinə görə, Anqara-Yenisey makrorayonunun inkişafı üçün ayrıca bir layihə və Cənubi Sibir ərazisinin inkişafı üçün isə başqa bir layihə mövcuddur. Nadir Quliyev azvision.az
|
