Aprel qazisindən Xoşqədəm və Zaura ciddi ittiham: "VERİLİŞƏ ÇIXMAQ ÜÇÜN PUL İSTƏDİLƏR!”

Aprel döyüşlərinin iştirakçısı, ikinci qrup əlil, baş gizir Əzimov Elşən Balaxan oğlu aparıcılar Xoşqədəm Hidayətqızı və Zaur Baxşəliyev haqqında ciddi ittihamlar səsləndirib.
Qazi bildirib ki, müalicəsinə görə, maddi dəstəyə ehtiyacı olduğu üçün X.Hidayətqızının və Z.Baxşəliyevin verilişinə çıxmaq niyyəti olub. Bununla bağlı Z.Baxşəliyevin verilişinə zəng vuran qaziyə bildirilib ki, efirə çıxmaq üçün ödəniş etməlidir: "Zaur Baxşəliyevin verilişində təqdim etdiyi nömrəyə zəng vurub efirə çıxmaq istədiyimi dedim. Dəstəyə cavab verən qız bunun üçün 500 manat ödəniş etməli olacağımı bildirdi. Dedim ki, efirə çıxım yığılan puldan götürərsiniz, amma razı olmadılar”.
Bundan sonra X.Hidayətqızına zəng vuran qaziyə bildirilib ki, qeydiyyata alınıb, çağırılacaq: "Xoşqədəm Hidayətqızına zəng vurdum. Növbəyə yazıldığımı bildirsə də, sonradan edilən dəfələrlə telefon zənglərinə cavab vermir, ya da biləndə ki, zəng vuran mənəm telefonu söndürür. Bunlar özlərini xalqa elə göstərirlər ki, guya kiməsə kömək edirlər. Buyursunlar, köməyə ehtiyacı olanlardan biri də mənəm, gör heç verilişə çağırırlarmı?”.
Xatırladaq ki, baş gizir Elşən Əzimov 16 il orduda xidmət edib. 2016-cı il aprel döyüşləri zamanı Lələtəpə yaxınlığında kontuziya alıb. Ayaqları tutulan qazi mütəmadi müalicə olunduğunu və bunun üçün maddi imkanının çatmadığını bildirib. 
Qazimiz ailəlidir və 4 övladı var. /antv.az/

03-02-2019 18:30 Baxılıb: 330    
Şərh bildir