"Yeni Azərbaycan" qəzetinin sabiq baş redaktoru Hikmət Babaoğlunu hoqqabazlıqda suçladı

Tanınmış publisist-jurnalist Xeyrəddin Qoca moderator.az-a göndərdiyi bu dəfəki yazısında "Yeni Azərbaycan" qəzetini və onun baş redaktoru Hikmət Babaoğlunu həqiqəti təhrif etməkdə qınayıb.
 
"Aprelin 10-unda "Yeni Azərbaycan" qəzetinin ilk nömrəsinin işıq üzü görməsindən 28 il keçir. Hələ qəzetin 20 illik yubileyində mənim "Xalq qəzet"inin 7 aprel 2013-cü il tarixli sayında ""Yeni Azərbaycan" yeni Azərbaycan uğrunda mübarizədə" adlı müsahibəm dərc edilmişdir. Həmin müsahibə mənim 2018-ci ildə buraxılan "Yazdıqlarım... Yazılanlar..."adlı kitabımda da çap olunmuşdur. Yazını ixtisarla yenidən hörmətli oxuculara çatdırmağa məcburam. Çünki "Yeni Azərbaycan" qəzeti başda baş redaktor Hikmət Babaoğlu olmaqla bilərəkdən həqiqəti təhrif edir!
"-Xeyrəddin müəllim, Yeni Azərbaycan qəzeti necə yarandı?
-Bilirsiniz ki, 1992-ci ilin noyabrında Yeni Azərbaycan Partiyası yaradıldı. Mən də "Heydər Əliyev Partiyası" adlandırılan bu partiyanın yaradılmasında iştirak etdim, kiçik xidmətlər göstərdim. Sonra Heydər Əliyev Bakıya gəldi, partiya üzvləri ilə görüşdü. Görüşdən sonra Heydər Əliyev "Siyasi Şura üzvləri qalsın" dedi. Mən də Siyasi Şuranın üzvü idim. Yeri gəlmişkən, qeyd edim ki, Naxçıvanda YAP təsis olunanda Heydər Əliyev mənə İdarə Heyətinin üzvü olmağı təklif etdi. Mən isə bildirdim ki, jurnalist olduğumçün tez-tez keçiriləcək iclaslarda iştirak edə bilməyəcəyimdən ehtiyat edirəm. Heydər Əliyev də "Onda səni Siyasi Şuranın üzvü seçərik" deyə bildirdi.
...Siyasi Şura yığışdı. Orada bəzi məsələlər müzakirə olundu, o cümlədən, partiyanın qəzetinin yaradılmasının vacibliyi Siyasi Şura üzvlərinin nəzərinə çatdırıldı.
Bəziləri dedi ki, gəlin qəzetin adını "Yeni Azərbaycan" qoyaq, partiyanın adına uyğundur. Mən isə bildirdim ki, "yeni" sözü ilə çıxan qəzetlər çoxdur, bəlkə başqa ad seçək. Heydər Əliyev "Qəzetin adının "Proqress" qoyulması necə olar?" deyə soruşdu (O, həmişə insanların fikrini öyrənmək istəyirdi). Hərə bir fikir söylədi, axırda qəzetin "Yeni Azərbaycan" adı ilə çıxarılması qərara alındı. Sonra üzünü mənə tutub dedi: "Xeyrəddin Qoca, mən bilirəm, sən "Səs" qəzetinin redaktoru olmaqdan imtina etmisən ki, partiyanın qəzeti yaradılacaq... Sən olarsan "Yeni Azərbaycan" qəzetinin baş redaktoru. Biz hələ görüşəcəyik..."
-Heydər Əliyev hansı görüşü nəzərdə tuturdu?
-O 1993-cü il martın 26-da Rafael Allahverdiyevlə məni qəzetin yaradılmasına hazırlıqla əlaqədar Naxçıvana çağırdı. Heydər Əliyev artıq Naxçıvan MR-nın Ali Məclisinin sədri idi. Söhbət zamanı mənə dedi ki, qəzet aprelin 10-unda çıxmalıdır.
-Bəs siz 15 gün müddətinə qəzeti necə buraxdınız?
-Elə məni də o narahat edirdi. Heydər Əliyevə narahatçılığımın səbəbini bildirdim. Dedim ki, belə az vaxtda qəzeti çıxarmaq çətindir. İş otaqları yox, müxbirlər yox, yazılar yox, heç bir avadanlıq yox! Heydər Əliyev dilləndi; "Bürokrat olma, get qəzeti çıxart!" İndi mənim təkbaşına işə necə girişdiyimi təsəvvür edin. Əlbəttə, Heydər Əliyev dediyi gün- aprelin 10-unda qəzetin ilk nömrəsini çıxardım. Hiss etdim ki, kişi məndən çox məmnun oldu. Çünki o məni heç zaman üzümə tərifləmirdi. Gülümsəməyindən hər şeyi anlayırdım..."
İndi görün, Hikmət Babaoğlu "Yeni Azərbaycan" qəzetinin 10 aprel 2021-ci il tarixli sayında nə yazır: "Həmin dövrdə (YAP yarıdılanda-  X.Q.) müxalifətdə olan Yeni Azırbaycan Partiyasının təşkilatlanması və fəaliyyətinin ictimaiyyətə çatdırılması üçün kütləvi informasiya vasitələrinə çıxış vacib idi. Ona görə də partiyanın rəsmi mətbu orqanının yaradılması ideyası ortaya çıxdı. Təşəbbüskarlar bu ideyanı gerçəkləşdirmək məqsədilə partiyanın yaradıcısı Ulu Öndərlə məsləhətləşmək üçün Naxçıvana yola düşdülər. Hikmət Babaoğlu, Naxçıvana yola düşən "təşəbbüskarlar" kimlər idilər? 
Hikmət Babaoğlu davam edir: "1993-cü ilin mart ayının 26-sında Azərbaycan xalqının Ümummilli Lideri Heydər Əliyevlə görüşən, onun xeyir-duasını alan redaksiya heyəti (?!) aprel ayının 10-unda qəzetin ilk nömrəsinin işıq üzü görməsinə nail oldu". Hikmət Babaoğlu, Rəfael Allahverdiyevlə mən Heydər Əliyevlə görüşəndə redaksiya heyəti vardı? Həm də "qəzetin ilk nömrəsi" yox, "ilk sayı" yazılmalıdır!
Qəzetin 20 illiyində də Hikmət Babaoğlu eyni ilə belə uyuşmaz fikirlər yazmaqla, az qala demək istəyirdi ki, qəzetin ilk nömrəsini o çıxarıb! 
O zaman redaksiyaya gedib Hikmətə iradlarımı bildirdim. O xeyli susandan, heç bir arqument gətirə bilmədikdən sonra dilləndi: "Uşaqlar səhv ediblər". Mən də onun üzünə dedim ki, "Səhvi sən, həm də bilərəkdən etmisən!" Gördüyünüz kimi, Hikmət Babaoğlu "səhv" etməkdə davam edir! Mən 2013-cü ildə onun bu "səhvini" üzünə desəm də, mətbuata çıxarmadım, yəni çox açıb-ağartmadım. Lakin partiyanın bəzi üzvləri belə "səhvlərə" tez-tez yol verdiklərindən, nəhayət bunları yazmağın vaxtı çatmışdır. Məsələn, hamı bilməlidir ki, "91-lər"in Heydər Əliyevə Müraciəti əvvəl "İki sahil" qəzetində, bir gün sonra "Səs" qəzetində dərc olunmuşdur! Mən bu faktı iki dəfə "Azərbaycan" qəzetində Heydər Əliyev haqqında yazdığım məqalələrdə qeyd etmişəm. Bəs niyə "Səs"qəzetinin adı 28 ildir "qəhrəman qəzet" kimi hallandırılır? Hətta "525-ci qəzet"ə dövlət tərəfindən 10 000 manat ayrılanda, "Səs" qəzetinə 20 000 manat ayrılır - niyə? Çünki "Əlincə" xeyriyyə Cəmiyyətinin orqanı olan "Səs" qəzetini qabağa vermək üçün o zaman Fərəməz Maqsud və Əli Nağıyev Heydər Əliyevə saxta məlumat vermişlər ki, guya "91-lər"in Müraciəti "Səs" qəzetində dərc olunub! Bax belə! Hələ bu harasıdır? Partiyada daim insanların, o cümlədən mənim haqqım yeyilib. Susmuşuq, əzab çəkmişik, dinməmişik. İndiyə qədər belə haqsızlıqlar davam etdiyi üçün kimsə bu haqda danışmalıdır. Bilirəm ki, qarğa-quzğun kimi töküləşəcəklər üstümə, amma daha dözmək olmur! Və bilirəm ki, rəhmətlik Ümummilli Liderimiz Heydər Əliyevin və YAP-ın indiki sədri, Azərbaycan Prezidenti İlham Əliyevin bəzi faktlardan xəbərləri olmayıb. YAP-dakı çuğullar nə qədər adamların işsiz qalması üçün rəylər yaradıb yayıblar, böyük haqsızlıqlar ediblər! Partiya üzvlərinin əməyini "gizlətmək" üçün dəridən-qabıqdan çıxıblar! Mən isə Ümummili Liderdən və onun varisindən daim diqqət və qayğı gördüyümdən, məni tamamilə sıradan çıxara bilməyiblər!
Yenə fakta keçək. 
Təsəvvür edin, mənim 14 sentyabr 1990-cı ildə baş redaktoru olduğum "Dan ulduzu" qəzetində Heydər Əliyevin doğma vətəni Naxçıvanda necə hərarətlə qarşılanması haqqında "Xalq məhəbbəti... Böhtançıların aqibəti..." adlı yazım dərc olunur, 1996-cı ildə Naxçıvanda tərtib olunub Bakıda çıxan "Qayıdış 1990-1993" kitabında "Böhtançıların aqibəti..." başlığı altında dərc olunur, imzamın altında "Şərq qapısı"(?) qəzeti, 11-12 dekabr 1992-ci il" (?) yazılır. Yazını oxuyanlar isə açıq-aydın görürlər ki, əhvalatlar 1990-cı ildə Heydər Əliyevin Naxçıvana qayıdışı ilə əlaqədardır! Kitabı tərtib edənlər bunu bilərəkdən etmişlər ki, mənim 1990-cı ildə heç kimin yaza bilmədiklərini yazdığımı "gizlətsinlər!" Axı 1990-cı ildə Heydər Əliyev haqqında mənim yazdıqlarımı heç kim yazmağa cəsarət etmirdi... 1992-ci ildə Ümummilli Liderimiz haqqında hər kəs yaza bilərdi... Bunu qeyd etməklə özümü "gözə soxmaq" fikrindən çox uzağam, çünki bu, mənim borcum idi.
Nəzərinizə bir faktı da çatdırım. Mən 50 ildir ki, Azərbaycan televiziyalarında və efirlərdə çıxışlar edirəm. YAP yaranandan indiyədək mənə bircə dəfə də çıxış üçün söz verilməmişdir. Bunu kimlər və nə üçün edirlər? Səbəb məlumdur, mənim kimi adamları unutdurub, özlərini önə çıxarmaq istəyirlər. Özlərini önə çıxarmaq istəyənlərin isə partiyada heç bir xidmətləri, xalq içərisində isə heç bir hörmətləri yoxdur! Sadəcə vəzifədən-vəzifəyə dırmanırlar...
Buna necə dözmək olar ki, partiyanın necə yaradılmasından söhbət gedir, gənc partiya üzvləri çıxıb bilmədikləri məsələdən danışırlar, "91-lər"ə isə qətiyyən söz verilmir! Konfrans xatirinə konfranslar keçirirlər, təzə vəzifəyə qoyulan adama söz verilər ki, özlərinə dost qazansınlar ki, sabah ondan bir xahiş edəndə etiraz edə bilməsin! O təzə vəzifəyə qoyulan da nəinki azərbaycanca danışa bilmir, ümümiyyətlə mənasız  məntiqsiz danışır...
Partiyaya indiyədək rəhbərlik edənlərin özləri partiyaya və dövlətə qarşı sadiq olmadıqları üçün həmişə qeyri-səmimi danışırdılar... 
Yaxşıdır ki, partiyanın sədri son qurultayda böyük dəyişikliklər etdi, belələrinin əlindən bəzi səlahiyyətlərini aldı!
Faktları sadalamaqla bitən deyil.
Mən bu yazını yazmaya da bilərdim. Görürəm artıq bəziləri dözülməz hərəkətləri ilə partiyanın adına ləkə gətirirlər! Nəhayət, hərə öz yerini bilməli, kimin kim olduğu aşkara çıxarılmalıdır!"
шаблоны для dle 11.2
12-04-2021 21:40 Baxılıb: 930    
Şərh bildir
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent
yenilə, əgər kod görünmürsə
{sape_links}{sape_article}